Natural News rapporterer at Sveits har laga kriseplanar i tilfelle landet står overfor energimangel i vinter. Kjeldene for artikkelen er nettstadene Blacklisted News, Cryptogon.com og den britiske avisa Daily Mail. Sveits skal ha delt kriseplanen inn i to hovudkategoriar: unntakstilstand (emergency) og krise (crisis). Unntakslaget (emergency tier) har i sin tur tre grader av restriksjonar, medan kriselaget (crisis tier) har fire. Daily Mail skriv òg at planen er designa for å fungere som covid-19-nedstengingane – der kvart stadium blir sett i verk avhengig av volumet energi som er tilgjengeleg.

Natural News skriv (mi omsetjing):

«Under den minst ekstreme unntakskategorien vil folk bli bedne om å ikkje vaske kleda sine på høgare enn 104 grader Fahrenheit (40 grader Celsius). Offentlege bygningar skal ikkje varmast opp til meir enn 68 grader F (20 grader C), men medisinske fasilitetar slik som sjukehus eller sjukeheimar vil bli unntekne denne avgrensinga.

Under den nest ekstreme unntaktsavgrensinga vil offentlege bygningar ikkje varmast opp til meir enn 66,2 grader F (19 grader C). Strøymetenester vil òg bli bedne om å lyde ved å avgrense skjermoppløysinga til videoar til standardoppløysing i staden for høg oppløysing.

Det tredje unntakslaget vil krevje at butikkar kuttar i opningstidene sine med opp til to timar kvar dag. Elektriske køyretøy (EK-ar) vil òg bli avgrensa til å berre ta naudsynte reiser – handle inn mat, legekonsultasjonar og det å vere til stade på ein profesjonell praksis, religiøs hending eller møte i retten.

Under det fyrste kriselaget (crisis tier) vil offentlege toalett ikkje ha varmtvatn og air condition i private heimar vil bli forbode. Under det andre kriselaget vil heisar og offentlege ismaskiner bli deaktiverte, og julelys vil ikkje bli slått på.

Under det tredje kriselaget vil symjebasseng bli stengde, og kryptovaluta-mining vil bli forbode. Sportsstadion og nattklubbar vil ikkje ha lys på under denne restriksjonen. Det mest ekstreme kriselaget vil innebere nedstenging av alle bedrifter og forbod mot alle offentlege samlingar – sportskampar, konsertar, opera og teaterframføring.»

Daily Mail skriv at Sveits forventar energimangel i vinter fordi dei er avhengige av imporert energi. Dei er ikkje lenger so avhengige av russisk gass sidan dei har funne alternative kjelder, men det er framleis uvisse. Tyskland, som òg var avhengig av russisk gass før Russland-Ukraina-krigen, er den største energiforsynaren til Sveits. Frankrike er den nest største, men dei har for tida problem med kjernekraftreaktorane sine.

Sveits produserer riktig nok energi sjølv, der 60% kjem frå hydroelektriske kraftstasjonar slik som demningar over elvar eller generatorar som er plasserte mellom sjøar. Dei fleste er nok klare over at Sveits ikkje har kystlinje, men mange sjøar, deriblant Genève-sjøen. Ein tredjedel av straumen kjem frå kjernekraft, som regjeringa har plikta seg til å gradvis redusere. Den gjenverande prosentdelen kjem frå ein kombinasjon av tradisjonelle og fornybare energikjelder.

Natural News skriv vidare:

«Sveits produserer for det meste nok energi kvart år til å halde lyset på, men produksjonen varierer frå månad til månad. Grunnen til dette er at vasskraft er avhengig av regn og snøsmelting for å fylle opp elvar og reservoar, som naturleg stig om våren og sommaren, men minkar om hausten og vinteren.

Dette tydar at sveitsarane eksporterer enorme mengder kraft til nabolanda i dei varme, regnfulle månadene og importerer i dei kaldare månadene. Men den uvanleg tørre sommaren i Europa som har fått sjøar og elvar til å tørke, har ført til at Sveits produserer mindre energi enn forventa frå sine hydroelektriske kraftverk.

Den sveitsiske regjeringa meldte tidlegare at dei planlegg å forby bruken av elektriske bilar for ‘ikkje-essensielle’ reiser dersom nasjonen går tom for energi i løpet av vinteren. Ekspertar sa at situasjonen denne vinteren burde bli betre, sjølv om landet framleis treng å investere langt meir for å garantere ei langsiktig energioverføring frå fossildrivstoff til fornybare kjelder.»

Kriseplanane er førebels ikkje sett i verk, men den sveitsiske staten følgjer nøye med på eventuell prisauke og minke av energiforsyning. Det sveitsiske føderale energikontoret (SFOE) seier at energimarknaden er vanskeleg å berekne, og at prisar reagerer sterkt på nye uvissemoment. Ei hending som kan utløyse kriseplanane er til dømes dersom temperaturane er konsekvent låge over tid.