McDonald’s har bestemt seg for å gjere restaurantane sine menneskelause i eit forsøk på å auke lønningane til dei på toppen og gjere dei på golvet, vel, overflødige. I ei nyleg pressemelding erklærte McDonald’s eit nytt partnarskap med Google som vil nytte seg av søkjemotorgiganten sin kunstige intelligens (KI)-teknologi i franchise-føretaka til McDonald’s. Dette melder Natural News sin flittige skribent Ethan Huff.

Huff skriv (mi omsetjing):

«No når sjølvbetjeningsskrankar allereie dukkar opp i McDonald’s-restaurantar over heile verda, er neste steget for verdas mest kjende hurtigmatkjede å kvitte seg med alle dei gjenverande menneske-tilsette og erstatte dei med robotar og datamaskiner.

‘Vi ser strålande moglegheiter for vekst i våre digitale forretningar, og vårt partnarskap med Google Cloud lèt oss tene på dette ved å bruke vår storleik og skala til å byggje evner og innføre løysingar i umatcha hastigheiter,’ kommenterte McDonald’s sin Executive Vice President og Global Chief Information Officer Brian Rice, som tener nesten fem millionar dollar i året i selskapet.

‘Å knyte våre restaurantar over heile verda saman med millionar av datapunkt gjennom vårt digitale økosystem, inneber at verktøy blir kvassare, modellar blir smartare, restaurantar blir enklare å drive, og viktigast av alt, den totale opplevinga for våre kundar og mannskap blir endå betre’.»

Eg lurer på om denne satsinga på KI kan ha noko å gjere med at McDonald’s og andre hurtigmatkjeder i delstaten California i september vart tvinga til å auke minstelønna til sine tilsette til minst 20 dollar i timen. Det er sikkert berre tilfeldig…

Vidare skriv Huff:

«McDonald’s seier at deira nye partnarskap med Google og KI-programmet ‘er eit betydeleg steg for McDonald’s i å avansere si restaurant-teknologi-plattform til å bli den mest sofistikerte og produktive i industrien’.

Legg merke til at McDonald’s har gått vekk frå å bry seg om ting slik som matkvalitet og ei heilskapleg restaurantoppleving. I staden ser McDonald’s ut til å gå inn for å få kundar inn og ut av lokalet so raskt som mogleg, med so lite menneskeleg samhandling som mogleg – fordi menneske-tilsette kostar selskapet dei pengane som dei heller ville ha stappa i lommene på Rice og andre høgtståande leiarar.

Ifølgje hurtigmatkjeda vil det å late KI-robotar ta over merket bringe ‘betydelege avansement’ til kvar restaurant og deira ‘kundeplattformer’.

‘Med ei konsekvent tilnærming forventar McDonald’s å sende ut innovasjonar med mykje høgare fart og smidigheit,’ står det vidare i pressemeldinga. ‘McDonald’s vil bruke banebrytande datakraft frå Google Cloud til å drive desse nye plattformene, og tilføre informasjonslagring og kraftig databehandling inn i individuelle restaurantar.’

Ein annan som kommenterte på partnarskapen var Thomas Kurian, Chief Executive Officer i Google Cloud, som feira det faktum at McDonald’s går vekk frå å ha menneske arbeidande i restaurantane sine.

‘Gjennom denne omfattande partnarskapen vil Google Cloud hjelpe McDonald’s gripe nye moglegheiter til å transformere føretaket og kundeopplevingane sine, noko som myndiggjer restaurantar over heile verda med den nyaste teknologien,’ sa han.

‘Når ein parar det ikoniske merket, storleiken og skalaen til McDonald’s med Google Cloud si djupe historie i KI og teknologisk innovasjon, vil dette omdefinere korleis denne industrien fungerer og kva folk forventar når dei går ut og et.’

I kommentarfeltet påpeikte mange at kundeopplevinga på McDonald’s mildt sagt har vore middelmåtig i mange år.

‘KI spyttar i det minste ikkje i maten din, so det er då éin fordel,’ skreiv ein av dei.

‘Kven et eigentleg dette grapset?’ spurde ein annan. ‘Ingen brus, ingen mat som ikkje er ekte mat. Det er billegare og sunnare.’

Andre påpeikte at til og med vanleg mat frå supermarknader i USA er ekstremt usunn på grunn av dei heilt rævva forbrukarvernlovene i landet.»

Sjølvbetjente bestillingsskrankar på hurtigmatrestaurantar som McDonald’s og Burger King har dukka opp òg her i Noreg. Samstundes har butikkjeder slik som Coop i lengre tid late kundane skanne varene sine sjølve. Sjølv hugsar eg tilbake i 2003, då butikken Oy! vart lansert i Bergen. Der var heile butikken sjølvbetjening – men røyk og alkohol måtte ein likevel kjøpe via dei tilsette sidan slike varer krev legitimasjon. Dei selde billegbrød til berre tre kroner stykket, og dette var strålande for meg som då var fattig student. Butikken varte derimot ikkje lenge – folk var ikkje klar for konseptet. No, derimot… Eg har registrert at tilsette på daglegvarebutikkar hevdar at dei ikkje kjem til å bli overflødige og misse jobben på grunn av sjølvbetjeningskassar. Korleis kan dei vere so skråsikre på akkurat det?

Den dagen ei maskin kan gjere jobben din, bør du førebu deg på å måtte sjå deg om etter ein ny jobb.