Nettstaden ReMix News melder:

Medan politiske analytikarar rundt om i verda undersøkjer korleis Fridomspartiet i Austerrike (FPÖ) fekk diger valsiger under valet i Austerrike sist sundag [29.september 2024], kjem ein ungarsk analytikar med teorien om at avlysinga av ein Taylor Swift-konsert på grunn av ein terrortrugsel i Wien kunne ha skubba det høgreorienterte partiet over mållinja.

«Det er nok å tenkje på hendingane som fann stad for nokre veker sidan, då nokre unge islamistar, som allereie hadde blitt radikaliserte i Austerrike, prøvde å utføre attentat under Taylor Swift-konserten i Wien. Styresmaktene innrømte òg at dersom det islamistiske åtaket hadde funne stad, ville der ha blitt mange offer,» sa Péter Dobrowiecki, forskingsleiar det ved Ungarsk-tyske instituttet Mathias Corvinius Collegium (MCC), i ein samtale med den ungarske nyheitsformidlaren Hirado.hu.

Då intervjuaren spurde han om ein avlyst Taylor Swift-konsert verkeleg kunne ha påverka valresultatet, dobla Dobrawiecki innsatsen:

«Dette er ein ganske so ekstrem teori, men til sjuande og sist gjorde det det (påverka resultatet). Der har vore terrorhandlingar i Austerrike før. I november 2020 vart fleire personar myrda i Wien av ein væpna (utanlandsk) galning på open gate. Austerrikarane har allereie opplevd korleis eit faktisk islamistisk åtak er, so eit mislykka terroråtak veg tyngre der enn i Ungarn eller andre land i regionen,» sa Dobrowiecki.

«Folk opplever allereie kvardagsproblem på gata. Ifølgje demografisk statistikk er kvar tredje eller femte person i austerrikske storbyar ikkje ein austerriksk statsborgar eller fødd i Austerrike. Dette i seg sjølv er ikkje naudsynlegvis eit problem, men når dette same mønsteret gjenspeglar seg i kriminalitetsstatistikken – spesielt når det gjeld valdsbrotsverk – kan austerrikske veljarar sjå samanhengen,» sa han.

Han sa deretter at den mislykka integreringa i Tyskland er, til ei mindre grad, «ein kopi av situasjonen i Austerrike. Der blir utført fleire og fleire brotsverk av folk med innvandrarbakgrunn, og problemet med spreiinga av radikal islamisme blir meir presserande.»

Påstandane hans kan ha ei viss truverdigheit. For det fyrste var det unge veljarar som sikra FPÖ valsigeren, og dei enda opp med å stemme på partiet i høgare tal enn spørjeundersøkingane spådde at dei kom til å gjere. Mange av desse yngre veljarane er notorisk vanskelege å spørje ut, sidan dei er vanskelegare å nå via tradisjonelle metodar, slik som fasttelefonar.

Merkverdig vann partiet heile 37% av veljargruppa i alderen 35 til 59, og 27% av 18 til 34 år. Den einaste grunnen til at partiet ikkje gjorde det betre enn den allereie rekordhøge prestasjonen, var på grunn av eldre veljarar, som i overveldande grad støtta dei etablerte partia.

Taylor Swift-fans, òg kjent som «Swifties», er notorisk besette av songarinna, og det at ho kom til Wien vart høgst sannsynleg rekna som ei stor begivenheit. Det faktum at ho måtte avlyse tre konsertar tydar at fleire titals tusen fans vart påverka. Swift sjølv sa om dei planlagde terroråtaka at dei fylde ho med «ei ny kjensle av frykt», og at ho følte «ei stor mengd skuld» for hending. Det er verdt å merkje seg at Swift sjølv har uttrykt støtte til Kamala Harris som president, men for tusenvis av skremde og opprørte Swift-fans i Wien, var samanhengen mellom islamistisk terrorisme og avlysinga av konsertar unekteleg.

Det vesle forspranget FPÖ hadde over ÖVP i dei endelege resultata kan altso vere fordi desse Swifties har påverka utfallet, om dei då stemte på FPÖ.

Unge menneske opplever òg konsekvensane av masseinnvandring på skular, på klubbar, og på leikeplassen. Til dømes er ein tredjedel av alle grunnskuleelevar i Wien muslimar, og stadig fleire elevar snakkar ikkje tysk. Vidare er det ikkje den eldste generasjonen som opplever seksuell trakassering, trugselen om valdtekt, og til og med mord, på grunn av masseinnvandring. Mesteparten av dei eldste menneska i det austerrikske samfunnet ser på innvandrarar som eit billeg alternativ som hushjelp eller nokon til å gjere hagearbeid for dei, og dei har sannsynlegvis lite med dei å gjere utanfor desse kontrollerte settingane.

Partiet FPÖ har òg fokusert på det yngre veljarar bekymrar seg for, og mange av partiaktivistane deira er yngre kvinner.

Den politiske analytikaren kom òg med andre kommentarar om valet, og sa at den grøne-ÖVPÅ-koalisjonen som har styrt Austerrike var eit «eksperiment».

«I dag kan det bli sett at dette var ein kortliva æra for både Tyskland og Austerrike, sidan støtta til dei grøne partia no har blitt halvert. Medan vi for nokre få år sidan kunne snakke om 18-20 prosent støtte i deira tilfelle, viser talet i dag berre 9-10 prosent. Dette indikerer at sjølv om desse partia har ein kjerne av veljarar, typisk den unge, urbane middelklasse-intelligentsiaen, har den større veljarbasen fordufta,» sa han.

Derimot, trass auken av FPÖ-støttespelarar, er dette kanskje ikkje nok til å danne ein koalisjon.

«Dei austerrikske parlamentpartia har allereie bestemt indikert at dei ikkje ønskjer å samarbeide med Fridomspartiet, og spesielt med partileiar Herbert Kickl. Derimot er det eit stort spørsmål om Det austerrikske folkepartiet, som har vore i fleirtal framtil no, kanskje ønskjer å vere del av ei regjering som ikkje er leia av Kickl, og kor vidt SPÖ (Det austerriske sosialdemokratiske partiet), som fekk tredje mest tal stemmer, vil samtykkje til ein slik avtale,» sa han.

Han trur at Folkepartiet, SPÖ og kanskje det liberale NEOS vil danne ein storkoalisjon, medan Fridomspartiet vil bli verande i opposisjon.

Omsett av redaksjonen i Saksyndig.