Liz Heflin på nettstaden Remix News melder:

Den ukrainske presidenten Volodymyr Zelensky har skrive på X at kampane går før seg langs heile frontlinja, «med spesielt kraftige slag i retning Pokrovsk og Kurakhove». Den ukrainske presidenten sa òg at ukrainske styrkar har vore under press i Kursk i fem dagar, og seier «russarane har prøvd å bryte seg gjennom vårt forsvar i Kursk-regionen. Våre folk står der stødig og går til motåtak.»

Ifølgje den ukrainske øvstkommanderande Olexander Syrskyj, har Moskva no trekt tilbake nesten 50 000 soldatar frå frontlinjene i sørlege Ukraina og flytta dei til Kursk for motåtak, rapporterer Die Welt.

I byrjinga av august kryssa Ukraina Russlands vestlege grense og hevda å ta kontrollen over 1300 kvadratkilometer av russisk territorium med over 100 busetnader. Derimot har Russland rapportert at dei tok tilbake fleire busetnader førre veke.

Kommandøren i den russiske Spetsnaz-eininga «Akhmat», general Apty Alaudinov, seier at nesten halvparten av områda tekne av Ukraina nær Kursk igjen har kome under russisk kontroll. «I dag merkjer vi oss at rundt halvparten av territoriet som vart okkupert av fienden har blitt frigjort,» har det statlege nyheitsbyrået Tass sitert han på å seie.

Det russiske forsvarsministeriet rapporterte òg at ein busetnad i Zaporizhia-regionen i sørlege Ukraina vart teken. Hæreiningar hadde «frigjort busetnaden Levadnoye» og «teke meir fordelaktige stillingar», erklærte det, sjølv om dette ikkje har blitt verifisert av ei uavhengig kjelde.

Levadnoye, eller Levadne på ukrainsk, hadde blitt overteke av Ukraina sommaren 2023 under ein motoffensiv.

Zelensky skreiv òg i går [14.oktober 2024] om noverande diskusjonar om at Ukraina skal bli med i NATO-alliansen, so vel som hans sokalla sigersplan.

«Denne veka skal vi presentere vår strategi for å tvinge Russland til ein rettferdig slutt på krigen til alle våre europeiske partnarar,» skreiv han på X.

Omsett av redaksjonen i Saksyndig. Sjå òg «Kreml kommenterer ‘sigersplanen’ til Zelensky», publisert 25.september 2024.