Den sokalla Innbyggerundersøkelsen 2024 kartlegg oppfatninga innbyggjarane har av politiet i Noreg. Ifølgje ein artikkel om saka på Politiforum, svarer 70% av innbyggjarane at dei har ganske eller svært høg tillit til politiet – noko som er ein nedgang på to prosentpoeng samanlikna med dei to føregåande åra, då 72% svarte det same. Politidirektør Håkon Skulstad har følgjande kommentar til denne relative nedgangen i tillit:

«Tilliten til politiet er fortsatt høy. 70 prosent er bra, men all nedgang i tillit følger vi nøye med på.»

Fordelt på politidistrikt har innbyggjarane i Trøndelag politidistrikt mest tillit til politiet, der 76% svarer at dei har svært eller ganske høg tillit til politiet. Lågast ut kjem Finnmark politidistrikt, der berre 61% har svært eller ganske høg tillit til politiet (2023: 64% / 2022: 63%). I Vest politidistrikt, som omfattar blant anna Bergen og Sunnfjord, svarer 67% at dei har svært eller ganske høg tillit til politiet (2023: 69% / 2022: 70%). I sistnemnde politidistrikt ser ein altso ein nedgang i tillit på tre prosentpoeng frå 2022 til 2024.

Ikkje overraskande har tilliten særleg falle blant innbyggjarar som har blitt utsett for éi eller fleire negative hendingar:

«Disse innbyggerne oppga at de ‘bare’ hadde 59 prosent tillit til politiet. Mens de som ikke hadde slike negative erfaringer, hadde hele 76 prosent tillit til politiet.»

Andre moment det er verdt å merkje seg:

«Siden 2023 har også andelen som har blitt utsatt for negative hendelser økt med to prosentpoeng. Kartleggingen viser at jo mer sentral kommunen er, jo flere har blitt utsatt for negative hendelser.

Andelen som er utsatt for minst en negativ hendelse, er seks prosentpoeng høyere i de mest sentrale kommunene, sammenlignet med de minst sentrale kommunene.»

Kvifor har tilliten til politiet gått ned? Som politidirektøren sjølv seier:

«Skulstad utelukker ikke at den lave oppklaringsprosenten kan ha sammenheng med at innbyggernes tillit faller.

Per andre tertial 2024 utgjorde den ‘magre’ 39 prosent.

‘Det vi ser fra tidligere års undersøkelser er at det som kanskje er det aller mest avgjørdende for innbyggernes tillit, det er å bli tatt på alvor, at politiet prøver å forstå innbyggernes sak, og oppklarer saken når de er utsatt for kriminalitet […].’

Skulstad legg so til: «Det kan være summen av mange sånne ting som påvirker tilliten fra innbyggerne. Men dette er vi veldig nysgjerrige på og skal nå gå nærmere inn i, og følge veldig nøye med på […].»

Eit lyspunkt i undersøkinga er derimot at politiet er meir tilgjengeleg enn før, at dei behandlar folk meir rettferdig, og at dei forklarer handlingane dei gjer. Sjølv om ei sak nesten garantert blir henlagt og ingen nokosinne blir formelt straffa, so blir det i det minste gjort på ein upåklageleg høfleg og danna måte. So får vi heller prøve å løyse saka på eiga hand – om vi kan.