27.oktober publiserte Saksyndig ein meiningsartikkel om Sigmund-saka, der Josefine Bru kom med sine tankar om saka. Der blir det antyda av ho at ekskona til Sigmund kan stå bak prosessen mot han. Eg vil nytte høvet til å dementere denne påstanden. Ekskona har ingenting med arrestasjonen eller politisaka mot Sigmund å gjere. Den originale tittelen gjev inntrykk av at dette er tilfelle, og tittelen har difor blitt endra. Den oppdaterte artikkelen vart lagt ut igjen 31.oktober.

Elles vil eg informere at Sigmund-saka har vist seg å vere for innfløkt for redaksjonen på grunn av avgrensa kunnskapar om Common Law. Difor har det no blitt bestemt at vidare dekning av saka skal gjerast av Sigmund sine støttespelarar i Frihetsbevegelsen og AgendaLMK, eventuelt Foreningen Lov og helse (som sjølv innrømmer at dei ikkje har so god greie på Common Law). Saksyndig har med andre ord gått over til å vere rein observatør av saka.

Manglande dekning i hovudstraumsmedia av saka skuldast at redaktørane har eit ønske om å skåne familien til Sigmund. På ein stad der alle kjenner alle kan slike saker erfaringsmessig skape ubehag og problem for dei det gjeld. Med andre ord følgjer journalistane Ver varsam-plakaten.

Josefine Bru er for tida på oppdrag for byrået sitt, og var difor ikkje tilgjengeleg for kommentar.